ஸ்மார்ட் ஆம்புலன்ஸ் நெட்வொர்க்கை அறிமுகப்படுத்திய அப்போலோ ஹாஸ்பிடல்ஸ்!

அப்போலோ ஹாஸ்பிடல்ஸ் தனது மருத்துவமனைக்கு முந்தைய தீவிர சிகிச்சை மற்றும் அவசரக்கால மீட்பு திறன்களை கணிசமாக விரிவாக்கும் வகையில், நகரத்தின் மிகப்பெரிய ஸ்மார்ட் அட்வான்ஸ்டு கார்டியாக் லைஃப் சப்போர்ட் (ஏசிஎல்எஸ்) ஆம்புலன்ஸ் நெட்வொர்க்கை அதிகாரப்பூர்வமாக அறிமுகப்படுத்தியுள்ளது. வானகரத்தில் உள்ள அப்போலோ ஸ்பெஷாலிட்டி ஹாஸ்பிடல்ஸில் நடைபெற்ற இந்நிகழ்வில், மதுரவாயல் தொகுதி சட்டமன்ற உறுப்பினர் திரு. P. ரேவந்த் சரண் அவர்கள் இந்த ஆம்புலன்ஸ் வாகனக் கூட்டமைப்பைத் தொடக்கி வைத்தார்.

இந்த அறிமுக விழாவின் ஒரு பகுதியாக, நேரடி அவசரக்கால மீட்பு செயல்விளக்கமும் செய்து காட்டப்பட்டது. இது அப்போலோவின் ஸ்மார்ட் ஏசிஎல்எஸ் ஆம்புலன்ஸ்கள் மற்றும் மருத்துவமனையின் அவசரக்கால கட்டளை மையத்திற்கு இடையே உள்ள தடையற்ற ஒருங்கிணைப்பை வெளிப்படுத்தியதுடன், நோயாளி பயணத்தில் இருக்கும்போதே நிகழ்நேர மருத்துவக் கண்காணிப்பு, தொடர்ச்சியான நோயாளி கண்காணிப்பு மற்றும் சரியான நேரத்தில் உயிர்காக்கும் தலையீடுகளை மேற்கொள்வதை சாத்தியமாக்குகிறது.

நகரும் தீவிரச் சிகிச்சைப் பிரிவுகளாக (ICUs on Wheels) செயல்படும் வகையில் வடிவமைக்கப்பட்டுள்ள இந்த அதிநவீன வாகனங்கள், பயணத்தின் போதே ஆம்புலன்ஸ் குழுவினரை மருத்துவமனை நிபுணர்களுடன் நேரடியாக இணைக்க நிகழ்நேர டிஜிட்டல் தொழில்நுட்பத்தைப் பயன்படுத்துகின்றன. சாலையில் செல்லும் போதே முக்கியமான மருத்துவ சிகிச்சைகளைத் தொடங்க வழிவகை செய்வதன் மூலம், சிகிச்சை தாமதங்களைக் குறைப்பதையும், சென்னை முழுவதும் உள்ள நோயாளிகளின் சிகிச்சை விளைவுகளை மேம்படுத்துவதையும் இந்த முன்முயற்சி நோக்கமாகக் கொண்டுள்ளது. மேம்பட்ட அவசரக்கால மற்றும் மருத்துவ சேவைகளுக்கான தேவை அதிகரித்து வருவதைத் தொடர்ந்து இந்த விரிவாக்கம் மேற்கொள்ளப்பட்டுள்ளது.

கடந்த ஆண்டில், சென்னையில் 12,794 நோயாளிகள் 1066 அவசரக்கால சேவைகள் மூலம் உதவி பெற்றுள்ளனர். விபத்து/காயங்கள், நெஞ்சு வலி, சுவாசக் கோளாறு, டயாலிசிஸ் தொடர்பான போக்குவரத்து ஆகியவை மிகவும் பொதுவாகப் புகாரளிக்கப்பட்ட அவசர நிலைகள் ஆகும்.  நோயாளியின் மருத்துவத் தரவுகள் மற்றும் முக்கிய உடல்நிலை அளவீடுகளை நிகழ்நேரத்தில் மருத்துவமனையின் அவசரச் சிகிச்சை அறைகளுக்குத் தெரிவிக்கும் இந்தத் திட்டத்தின் திறன் ஒரு முக்கியமான அம்சமாகும். இது மருத்துவப் பணியாளர்கள் நோயாளிகள் வருவதற்கு முன்பே அவர்களின் நிலையை மதிப்பிடவும், சரியான நேரத்தில் சிகிச்சை அளிக்கத் தயாராகவும் உதவுகிறது. மாரடைப்பு, பக்கவாதம், விபத்து காயங்கள், சுவாசக் கோளாறு போன்ற இக்கட்டான சூழ்நிலைகளில் சிகிச்சை தாமதத்தைக் குறைக்க இது உதவுகிறது.

அப்போலோவின் மத்திய செயல்பாட்டுக் கட்டளை மையம் (Apollo’s Central Operations Command Center), ஆம்புலன்ஸ்களின் நடமாட்டத்தைத் தொடர்ந்து கண்காணித்தல், அவசரக்கால மீட்புகளை நிர்வகித்தல், தொலைதூர மருத்துவ ஆலோசனைகளை எளிதாக்குதல், நிகழ்நேர மருத்துவ முடிவெடுத்தலைச் சாத்தியமாக்குதல் ஆகியவற்றின் மூலம் இந்த ஸ்மார்ட் ஆம்புலன்ஸ் சூழல் அமைப்பிற்குப் பங்களிக்கிறது. நோயாளியின் நேரடி உடல்நிலை அளவீடுகள் மற்றும் மருத்துவத் தரவுகளை மருத்துவமனையின் அவசரச் சிகிச்சை அறைகளுக்குப் பாதுகாப்பான முறையில் நேரடியாக அனுப்பும் திறனே இதன் முக்கிய அம்சம் ஆகும். இது அவசரச் சிகிச்சை அறை நிபுணர்கள் நோயாளியின் ஆரோக்கியத்தை ஆய்வு செய்யவும், ஆம்புலன்ஸ் வருவதற்கு முன்பே தனிப்பயனாக்கப்பட்ட சிகிச்சைத் திட்டங்களை வடிவமைக்கவும் அனுமதிக்கிறது. இதன் மூலம் மாரடைப்பு, பக்கவாதம், கடுமையான விபத்து காயங்கள் போன்ற நேரத்தை உணர்ந்து செயல்பட வேண்டிய மருத்துவ நெருக்கடி நேரங்களில் முக்கியமான நிமிடங்கள் சேமிக்கப்படுகின்றன. இந்த முழு நெட்வொர்க்கும் அப்போலோவின் மத்திய செயல்பாட்டுக் கட்டளை மையத்தால் நிர்வகிக்கப்படுகிறது, இது வாகனக் கூட்டமைப்பின் இயக்கத்தைக் கண்காணித்து, மீட்பு நடவடிக்கைகளை ஒருங்கிணைத்து, உடனடி மருத்துவ முடிவெடுத்தலை எளிதாக்குகிறது.

இந்நிகழ்வில் பேசுகையில், அப்போலோ ஹாஸ்பிடல்ஸ் சென்னை பிராந்தியத்தின் தலைமை நிர்வாக அதிகாரி டாக்டர் இளங்குமரன் கலியமூர்த்தி அவர்கள் இவ்வாறு கூறினார், “அப்போலோ 1066 அவசரக்கால சேவைகள் மூலம், சரியான நேரத்தில் கிடைக்கும் அவசர சிகிச்சைக்கான தேவை அதிகரித்து வருவதை நாம் தொடர்ந்து கண்டு வருகிறோம். இந்த முன்முயற்சியின் மூலம், மேம்பட்ட அவசரக்கால மருத்துவச் சிகிச்சையை எளிதில் கிடைக்கச் செய்வதன் வழியாக, மேலும் பல மக்களை சென்றடைவதையும் அவர்களுக்கு ஆதரவளிப்பதையும் நாங்கள் நோக்கமாகக் கொண்டுள்ளோம். ஒவ்வொரு நொடியும் முக்கியத்துவம் வாய்ந்த ஒரு சூழலில், நோயாளிகள் உயர்தர மருத்துவச் சிகிச்சைப் பெறுவதை உறுதி செய்வதற்கான எங்களின் அர்ப்பணிப்பை இந்தத் திட்டம் பிரதிபலிக்கிறது.”

வானகரம், அப்போலோ ஸ்பெஷாலிட்டி ஹாஸ்பிடல்ஸில் இருந்து இந்த வாகனக் கூட்டமைப்பைத் தொடங்குவதன் முக்கியத்துவம் குறித்து டாக்டர் இளங்குமரன் அவர்கள் மேலும் கூறியதாவது, “அப்போலோ வானகரம், சென்னையின் மிக முக்கியமான அவசர சிகிச்சை மையங்களில் ஒன்றாகும், இது நகரம், தொழில் துறை வழித்தடங்கள், மற்றும் தேசிய நெடுஞ்சாலைகளை இணைக்கிறது. இதயம், நரம்பியல், விபத்து சிகிச்சை, குழந்தை மருத்துவம், இரைப்பைக் குடலியல், தீவிர சிகிச்சைப் பிரிவு, புற்றுநோயியல் மற்றும் தீக்காய மேலாண்மை ஆகிய துறைகளில் நிபுணத்துவம் பெற்ற ஒரு நான்காம் நிலை அதிநவீன சிகிச்சை மையமாக இது திகழ்வதால், இந்த அடுத்த தலைமுறை தொழில்நுட்பம் சார்ந்த அவசரக்கால சேவைகளை வழிநடத்த இது மிகவும் பொருத்தமான இடமாக அமைந்துள்ளது. அப்போலோவின் நெட்வொர்க் மற்றும் எங்களின் ஒருங்கிணைந்த அவசரக்கால சூழல் அமைப்பின் மூலம், நோயாளி மருத்துவமனையை வந்தடைவதற்கு முன்பே சிகிச்சையைத் தொடங்க முடியும்.”

இந்த முன்முயற்சியின் மருத்துவத் தாக்கம் குறித்து, அப்போலோ ஹாஸ்பிடல்ஸ் தெற்கு பிராந்தியத்தின் அவசரக்கால சிகிச்சைத் துறைகளின் பிராந்திய மருத்துவ இயக்குநர் டாக்டர் தவபழனி A, அவர்கள் இவ்வாறு கூறினார், “இந்த ஸ்மார்ட் ஏசிஎல்எஸ் ஆம்புலன்ஸ்கள் நடமாடும் ஐசியு-க்களாக செயல்படுகின்றன. இதனால் நோயாளிகள் மருத்துவமனைக்கு வரும் வழியிலேயே மாரடைப்பு, பக்கவாதம், விபத்து காயங்கள் மற்றும் பிற கடுமையான அவசர நிலைகளுக்கான உயிர்காக்கும் சிகிச்சையைத் தொடங்க எங்களது குழுக்களால் முடிகிறது. அதிநவீன உபகரணங்கள், பயிற்சி பெற்ற அவசரக்கால பணியாளர்கள், மற்றும் மருத்துவமனை நிபுணர்களுடனான நிகழ்நேர இணைப்பு ஆகியவற்றின் மூலம், ஒவ்வொரு நிமிடமும் முக்கியத்துவம் வாய்ந்த சூழலில் சிகிச்சை தாமதங்களைக் குறைத்து, நோயாளிகளின் சிகிச்சை விளைவுகளை எங்களால் மேம்படுத்த முடியும்.”

ஆம்புலன்ஸ் வாகனக் கொடியசைத்துத் தொடங்கும் இந்நிகழ்வில், அப்போலோ ஹாஸ்பிடல்ஸ் லாஜிஸ்டிக்ஸ் பிரிவின் தலைமை செயல்பாட்டு அதிகாரி திரு. விஜய் வர்மா S, மற்றும் வானகரம், அப்போலோ ஸ்பெஷாலிட்டி ஹாஸ்பிடல்ஸின் தலைமை செயல்பாட்டு அதிகாரி திரு. கார்த்திக் இராமமூர்த்தி ஆகியோரும் உடனிருந்தனர்.

நிகழ்வு ஆய்வுகள்: மருத்துவமனைக்கு முந்தைய அவசர சிகிச்சையின் நிஜ-வாழ்க்கை தாக்கம்

நிகழ்வு 1: 1066 மேம்பட்ட உயிர் காக்கும் ஆம்புலன்ஸில்  (Advanced Life Support Ambulance) கொண்டு செல்லப்படும் போது, நோயாளிக்கு திடீரென மாரடைப்பு ஏற்பட்டது. வாகனத்தில் இருந்த பயிற்சி பெற்ற மருத்துவ உதவியாளர் உடனடியாக இந்த அவசர நிலையை கண்டறிந்து, அவசரக்கால மருத்துவரின் வழிகாட்டுதலின் கீழ் மேம்பட்ட உயிர் மீட்பு (advanced resuscitation) நடவடிக்கைகளைத் தொடங்கினார். மின்சார கார்டியோவெர்ஷன் மற்றும் கார்டியோபல்மோனரி ரிசசிடேஷன் (சிபிஆர்) ஆகியவை உடனுக்குடன் வழங்கப்பட்டதால், சில நிமிடங்களில் தன்னிச்சையான இரத்த ஓட்டம் மீட்டெடுக்கப்பட்டது. நோயாளி மருத்துவமனையை அடைவதற்கு முன்பே, அவரின் சுவாசப்பாதை சீர்செய்யப்பட்டு, ஆக்ஸிஜன் ஆதரவு தொடங்கப்பட்டு, இரத்த அழுத்தம் சீராக்கப்பட்டது. பின்னர் மேலதிகத் திட்டவட்டமான சிகிச்சைக்காக நோயாளி பாதுகாப்பாக ஒப்படைக்கப்பட்டார்.

நிகழ்வு 2: மற்றொரு நிகழ்வில், இரயிலில் பயணம் செய்து கொண்டிருந்த ஒரு இளம் கர்ப்பிணித் தாய்க்கு பிரசவ வலி ஏற்பட்டு, மருத்துவ உதவி அவரைச் சென்றடைவதற்கு முன்பே முன்கூட்டியே  குழந்தை பிறந்தது. அவசர அழைப்பைத் தொடர்ந்து, 1066 ஆம்புலன்ஸ் குழுவினர் சில நிமிடங்களில் சென்னை சென்ட்ரல் இரயில் நிலையத்திற்கு வந்தடைந்தனர். பயிற்சி பெற்ற மருத்துவ உதவியாளர், தாயையும் குழந்தையையும் மேலதிக மருத்துவச் சிகிச்சைக்காக  பாதுகாப்பாகக் கொண்டு செல்வதற்கு முன், சுவாசப்பாதையைச் சுத்தம் செய்தல், மற்றும் கிருமிநீக்கம் செய்யப்பட்ட தொப்புள்கொடி மேலாண்மை உள்ளிட்ட உடனடிப் பிறந்த குழந்தைப் பராமரிப்பை வழங்கினார். இந்த சரியான நேரத் தலையீடு ஒரு இக்கட்டான சூழ்நிலையில் தாய் மற்றும் குழந்தை இருவரின் பாதுகாப்பு மற்றும் நல்வாழ்வை உறுதி செய்தது.

இந்த நிகழ்வுகள், நோயாளிகள் மருத்துவமனையை அடைவதற்கு முன்பே உயிர்காக்கும் சிகிச்சையை வழங்குவதில், பயிற்சி பெற்ற மருத்துவ உதவியாளர்கள், மேம்பட்ட ஆம்புலன்ஸ் உள்கட்டமைப்பு, மருத்துவர் தலைமையிலான தொலைதூர மருத்துவ ஆலோசனை, மற்றும் தடையற்ற ஒருங்கிணைப்பு ஆகியவற்றின் முக்கியப் பங்கை அடிக்கோடிட்டுக் காட்டுகின்றன.